كود E10 في الغسالة: معناه والحل حسب الماركة
E10 في زانوسي وإلكترولوكس وميديا ويونيفرسال معناه واحد: المية مش داخلة أو داخلة ببطء. الفحص بالترتيب، واللي تعمله بنفسك، وإمتى تحتاج فني.
لو غسالتك وقفت وطلّعت E10 على الشاشة، الخبر الحلو إن الكود ده في كل الماركات تقريباً معناه حاجة واحدة: المية مش داخلة الغسالة، أو داخلة أبطأ من اللازم. والخبر الأحلى إن أغلب الحالات بتتحل من غير قطعة.
E10 معناه إيه بالظبط حسب الماركة
| الماركة | معنى E10 |
|---|---|
| زانوسي | الغسالة لا تمتلئ أو تمتلئ ببطء شديد |
| إلكترولوكس | الغسالة لم تصل لمنسوب الماء المطلوب في الوقت المحدد |
| ميديا (الأمامية) | تجاوز زمن دخول المياه — الملء بياخد وقت أطول من المسموح |
| يونيفرسال إيكو | دخول المياه بطيء جداً |
يعني الكارت فتح صمام الدخول، واستنى المنسوب يوصل لحد معين في وقت معين، وما وصلش. الكارت مش بيقول الصمام بايظ — بيقول المية ما جتش. والفرق ده هو اللي بيوفّر عليك فلوس.
الأسباب بالترتيب اللي بنلاقيها بيه
- ضغط المية ضعيف في العمارة — خصوصاً في أوقات الذروة. لو الدوش ضعيف في نفس الوقت، المشكلة مش في الغسالة. جرّب في وقت تاني.
- المحبس مش مفتوح لآخره — بيحصل بعد أي شغل سباكة.
- المصفاة الشبكية في فتحة دخول الغسالة اتسدت — بالرمل والصدأ، خصوصاً بعد انقطاع المياه ورجوعها. ده أكتر سبب على الإطلاق.
- خرطوم الدخول متني ورا الغسالة بعد ما اتزقّت في مكانها.
- صمام الدخول (البلف) بوظ — بيتقاس بالأوميتر.
- حساس المنسوب بيدّي قراية غلط — الغسالة بتفضل تملا وفاكرة إنها فاضية.
تنضيف المصفاة — تعملها بنفسك في 5 دقايق
- اقفل المحبس.
- فكّ خرطوم الدخول من ورا الغسالة (هيطلّع شوية مية — حط فوطة).
- جوه فتحة الغسالة هتلاقي مصفاة شبكية صغيرة. طلّعها بحرص ببنسة.
- اغسلها تحت المية لحد ما الشبكة تبقى نضيفة.
- ركّبها زي ما كانت، ورجّع الخرطوم بإحكام باليد من غير زرادية.
ده بيحل نسبة كبيرة جداً من حالات E10، وبننصح بيه مرة كل سنة حتى من غير أعطال.
إمتى تقف وتكلّم فني
- الكود رجع بعد ما نضّفت المصفاة والمحبس مفتوح والضغط كويس.
- بتسمع طقّة من ورا الغسالة أول ما تشغّلها ومفيش ولا نقطة مية — الصمام فاتح والمسار مسدود من جوه.
- مفيش طقّة خالص — الصمام أو الكارت.
- الغسالة بتملا وهي مطفية أو المية قرّبت من الباب — اقفل المحبس فوراً. دي الحالة الوحيدة المستعجلة.
صفحة كل ماركة بالتفصيل
لو عايز الشرح الخاص بغسالتك بالذات:
وفي كل الحالات: بنقيس الصمام وحساس المنسوب قبل ما نغيّر أي قطعة، والإصلاح بضمان 6 شهور. 01038881833